Í KSF eru 7 limakommunur, sum umboða 69,1% av íbúgvunum í Føroyum.
Endamálið
hjá KSF er at virka fyri felags áhugamálum og størri kommunalum
sjálvræði. Aðalhugsjónin er at skipa Føroyar í burðardyggar og
virkisførar kommunalar eindir, sum umsita øll mál, ið eru beinleiðis
viðkomandi fyri borgaran.
KSF arbeiðir fyri greiðum uppgávu- og ábyrgdarbýti millum land og kommunur, og at kommunali myndugleikin verður styrktur.
KSF er skipað við einum stýri, ið tekur avgerðir, einum starvsbólki, ið fyrireikar mál til stýrið, og eini skrivstovu, ið samskipar virksemi og útinnur avgerðirnar hjá stýrinum.
KSF
er ein tvørkommunalur áhugafelagsskapur og kann tí ikki binda
limakommunurnar við sínum samtyktum, men skulu limakommunurnar eisini
sjálvar samtykkja málini.
KSF samskipar, fyrireikar og ráðgevur
limakommununum í málum av felags áhuga og serstakt. Dømi uppá slík mál
kunnu t.d. vera: býti av uppgávunum millum land og kommunur, umboðan
mótvegis landsmyndugleikum o.ø., lógarsmíð og lógartulking, uppskot til
umsitingarligar mannagongdir og skipanir, førleikamenning v.m.
KSF samskiftir og samstarvar við landsumsitingina, vinnulívið, feløg og felagsskapir í Føroyum og uttanlands.
KSF er vegna limakommunurnar limur í Kommunala Arbeiðsgevarafelag Føroya (KAF),
hvørs endamál er at fremja áhugamál limanna í øllum málum um lønar- og
setanarviðurskifti starvsfólkanna. KAF hevur skrivstovu í KSF-húsinum.
KSF er við til at reka virksemið hjá Barnaverndarstovu Føroya (BVS), ið er felagskommunalur stovnur sambært barnaverndarlógina. BVS hevur skrivstovu í KSF-húsinum. |
