KSF stuðlar ætlanunum um eina fólksliga tilgongd í samband við kommunalu umskipanina
Kommunusamskipan Føroya hevur boðað
Innlendismálaráðnum frá, at felagið stuðlar ætlanunum um at fara undir
eina fólksliga tilgongd at skipa landið í burðardyggar og virkisførðar
kommunalar eindir.
Stýrið í Kommunusamskipan hevur einmælt samtykt at senda Innlendismálaráðnum soljóðandi fráboðan
Viðv. uppskotið um eina fólksliga tilgongd í samband við ætlaðu kommunalu umskipanina
Kommunusamskipan
Føroya hevur á stýrisfundi 18. februar 2011 viðgjørt uppskot frá
Innlendismálaráðnum um eina fólksliga tilgongd í samband við ætlaðu
kommunalu umskipanina.
Eitt samt stýrið í Kommunsamskipan Føroya
tekur undir við at farið verður undir eina fólksliga tilgongd at skipa
kommunurnar í Føroyum í burðardyggar og virkisførar kommunalar eindir.
Stýrið tekur somuleiðis undir við, at Innlendismálaráðið, í samráð við
kommunurnar, nýtir fólkatkvøður í teimum einstøku kommununum sum amboð í
fólksligu tilgongdini.
Kommunsamskipan Føroya hevur, síðani
felagið varð stovnað, tikið undir við og grundað sítt virksemi og sín
bygnað á tær 9 kommunueindirnar, sum vóru í uppskoti í kommunuálitinum
frá 1998. Kommunusamskipan Føroya heldur framhaldandi, at hetta uppbýti
er eitt hóskandi útgangsstøði. Kommunusamskipan Føroya vil tó gera vart
við, at semja er ikki um, hvørt kommunurnar í Suðuroynni skulu verða
skipaðar í eina ella tvær eindir. Í hesum sambandi vil Kommunusamskipan
Føroya heita á landsstýriskvinnuna, um at fara í dialog við einstøku
kommunustýrini í landinum, til tess at fáa avgreitt møguligar ósemjur.
Kommunsamskipan
Føroya metir uppskotið frá Innlendismálaráðnum sum fyrsta stigið í
einari kommunalari umskipan. Kommunusamskipan Føroya tekur tí sum givið,
at Innlendismálaráðið samstundis við hesi fólksligu tilgongd tekur stig
til, at aðrir tættir í kommunalu umskipanini verða viðgjørdur. Her
verður serliga hugsað um, hvørjar uppgávur skulu leggjast út til
kommunurnar, á hvørjum lógargrundarlagi hetta skal gerast, og hvussu
hesar uppgávur skulu fíggjast.
Í hesum sambandi vil felagið vísa
á yvirlýsing frá fundi millum kommunustýrini í Kommunusamskipan Føroya í
Klaksvík fríggjadagin 26. februar 2010, ið viðgerð allar tættir í
kommunalu umskipanini og sum staðfestir, at Kommunusamskipan Føroya bert
tekur undir við tilgongdini til nýggjan kommunalan bygnað, um talan
verður um eina heildarætlan.
Henda fráboðan er einmælt samtykt á stýrisfundi í kommunusamskipan Føroya 18 februar 2011.
KSF stuðlar ætlanunum um eina fólksliga tilgongd í samba
