Kommunal umskipan neyðug
Heðin Mortensen, stýrisformaður í Kommunusamskipanini, fegnast um, at álitið um kommunala umskipan nú er lagt fram.
”Kommunusamskipanin
hevur í nógv ár mælt til eina kommunala umskipan. Hetta uppskotið
fevnir vítt, og nú skulu vit viðgera einstøku tilmælini nærri,” sigur
Heðin Mortensen og vísir á, at enn er langt eftir á mál.
”Hetta
er bert fyrsta stigið í drúgvari tilgongd. Nú er umráðandi, at
landsstýrið stendur við ætlanina um eina kommunala umskipan, har
fólkaskúlin og eldrarøktarøkið verða løgd til kommunurnar at fyrisita”,
sigur Heðin Mortensen.
”Í hesum sambandi er týdningarmikið, at
kommunurnar kenna ætlanirnar hjá landspolitisku skipanini, so at tær
kunnu virka eftir tí, og at kommunurnar fáa veruliga ávirkan á ítøkiligu
ætlanirnar bæði viðvíkjandi kommunusamanlegging, útlegging av uppgávum
og fíggingini.”
Heðin Mortensen leggur aftrat, at breið politisk
semja skal til, so at kommunurnar hava álit á ætlaðu umskipanirnar.
”Umskipan av hesi stødd krevur breiða politiska semju millum bæði
samgongu og andstøðu, tí tað ber ikki til at steðga
umskipanartilgongdini á hálvari leið, bert tí at politiska samansetingin
í landsstýrinum broytist,” sigur Heðin Mortensen, stýrisformaður í
Kommunusamskipanini.
Kommunal umskipan neyðug mynd.jpg
