Listaleypurin
List og skúlanæmingar í miðdeplinum Listaleypurin er ein mentanarlig verkætlan, sum Norðurlandahúsið í Føroyum, Kommunusamskipan Føroya og Føroya kommunufelag
skipa fyri. Norðurlandahúsið, luttakandi kommunurnar og Mentamálaráðið
fíggja Listaleypin, sum fyribils er skipaður sum royndarverkætlan til og
við 2010. Listaleypurin
hevur til endamáls at geva fólkaskúlanæmingum høvi at uppliva góða
yrkislist. Fyrimyndin er eitt norskt átak, ið ber heitið "Den kulturelle
skolesekken". Átakið hevur fleiri ár á baki, og røkkur um alt landið
við fleiri hundrað framsýningum um árið. Tær
listafólkavitjanir og framsýningar, ið Listaleypurin bjóðar, eru
ókeypis hjá skúlunum. Miðað verður eftir, at í minsta lagi 10 listaverk
innan allar listagreinir ferðast millum skúlarnar hvørt skúlaárið, har
dentur verður lagdur a'at náa ymsum aldursbólkum og at spjaða
sýningarnar um alt landið. Listaleypurin er skipaður við stýrisbólki, sum hevur ábyrgd av verkætlanini. Í stýrisbólkinum eru Jóan Petur Hentze, aðalskrivari í Kommunusamskipanini, og Karl A. Olsen, borgarstjóri í Vestmanna kommunu og stýrislimur í Kommunufelagnum. Verkætlanarleiðari er Hedvig Westerlund-Kapnas, Norðurlandahúsið. Hvørt
skúlaár verður ein faldari við listatilboðum sendur skúlunum í øllum
luttakandi kommunum. Skráin fyri skúlaárið 2008-2009 sæst her. Meira fæst at vita um Listaleypin við at venda sær til verkætlanarleiðaran hedvig@nlh.fo, fartel 21 01 25 ella á heimasíðuni hjá Listaleypinum, trýst her.
Listafólk
kunnu søkja Listaleypin um framleiðslu- og ferðastuðul til ávísa
verkætlan. Lýst verður eftir listaligum verkætlanum eina ferð um árið,
og tekur serstøk úrvalsnevnd mannað við fakfólki innan list
og skúla avgerð um, hvørjar verkætlanir skulu verða partur av skránni
hjá Listaleypinum.
